കലിഫോര്ണിയ: ഇലോണ് മസ്കും ചാറ്റ് ജിപിടി നിര്മാതാക്കളായ ഓപ്പണ് എഐയും തമ്മില് നടന്ന നിയമപോരാട്ടത്തില് മസ്കിന് വന് തിരിച്ചടി.
കലിഫോര്ണിയയിലെ ഫെഡറല് കോടതി മസ്കിന്റെ ഹര്ജി തള്ളി. കേസ് ഫയല് ചെയ്യാന് മസ്ക് വലിയ കാലതാമസം വരുത്തിയെന്ന് ജൂറി കണ്ടെത്തിയതിനെത്തുടര്ന്നാണു നടപടി.
2015ല് ലാഭേച്ഛയില്ലാതെ പ്രവര്ത്തിക്കുന്ന ഒരു സന്നദ്ധസംഘടനയായി തുടങ്ങിയ ഓപ്പണ് എഐ പിന്നീട് വാണിജ്യവത്കരിക്കുകയും ലാഭം ലക്ഷ്യമിടുന്ന സ്ഥാപനമായി മാറുകയും ചെയ്തു.
കമ്പനിയുടെ ഈ മാറ്റം ആദ്യകാല കരാറുകളുടെ ലംഘനമാണെന്ന് മസ്ക് ആരോപിച്ചു. സൗജന്യമായി സാങ്കേതികവിദ്യകള് വികസിപ്പിക്കുക എന്നതായിരുന്നു ലക്ഷ്യമെന്നും സിഇഒ സാം ആള്ട്ട്മാനും മറ്റ് ഉന്നതരും ചേര്ന്നു കമ്പനിയെ ലാഭം കൊയ്യാനുള്ള ഉപകരണമാക്കി മാറ്റിയെന്നും അദ്ദേഹം വാദിച്ചു.
ആദ്യകാലത്ത് മസ്ക് ഓപ്പണ് എഐയില് പണം നിക്ഷേപിച്ചിട്ടുണ്ടെങ്കിലും അദ്ദേഹം ഈ കേസ് ഫയല് ചെയ്തതു വളരെ വൈകിയാണെന്നും സ്വകാര്യമായ താത്പര്യങ്ങള് മുന്നിര്ത്തിയാണു കേസ് നല്കിയതെന്നും കമ്പനി വ്യക്തമാക്കി.
മസ്ക് കേസ് ഫയല് ചെയ്യാന് വൈകിപ്പോയെന്ന് വിലയിരുത്തിയ ജൂറി, സാം ആള്ട്ട്മാനോ ഓപ്പണ് എഐയോ ട്രസ്റ്റിന്റെ ചട്ടങ്ങള് ലംഘിച്ചിട്ടില്ലെന്നും കണ്ടെത്തി. വിധിക്കെതിരേ അപ്പീല് നല്കുമെന്ന് മസ്ക് അറിയിച്ചു. ചാരിറ്റബിള് ട്രസ്റ്റുകളുടെ പ്രവര്ത്തനങ്ങളെ തകര്ക്കുന്ന മാതൃകയാണിതെന്നും അദ്ദേഹം വിമര്ശിച്ചു.
E-paper LOGIN
LOGIN